- 635 -

1435. Aug. 4. Liegnitz.

Testament Herzog Ludwigs II. und seiner Gemahlin, der Herzogin Elisabeth.

In dem namen vnsirs liebin hirren Jhesu Cristi vnd der hochgelopten jungfrawen Marian seyner liebin muter vnd allis hymmelischin heris amen. Wir Ludowig von gotis gnaden herczog in Slezien zum Brige vnd zu Legnicz vnd wir Elyzabeth von den selbigen gotis gnoden seyne gemahel herczogynne do selbist bekennen vffuntlichin mit diesin briffe allen den, dy en sehen adir horen lesin, das wir eygentlichin vorgenomen vnd betracht haben, wy wir von dem ewigen vnd abirsten gute, das got selber ist, vil czeytlicher gnoden vnd guttetat in vnser hirschafft zu rechter ordenunge entphangen haben, dorumme wir billichin dangsam seyn sollen, das czeytliche in das ewige zuvorwandiln mit sulcher bequemer schickunge, das dovon got der almechtige gelobit vnd vnsern vorfarn zelin getrost werden, wenne denne vnser liber hirre Jhesus allen seynen jungern vnd nochkomen zu eyner figuren alhy vff erden zu rechten zelgerethe nichtis nuczbaris denne den frede der zelen gelosen hot vnd eyme sulchin noch menschlicher begreyffunge nochzugeen vnd rue in frede vnsern zelen zuirwerbin bequemit, sich zubetrachten die czeit eris abscheydins, zo wir nichtis gewissers wissen, denne den tot vnd nichtis vngewissers, wenne dy czeyt des todis, alzo vns das denne dy heylgeschrifft ausrichtet, wenne denne zu vnserm zelgerethe vnd zu dirwerbunge der zelen zelykeyt nichtis nuczlicher hulffe irkennen, wenne das gebethe aller fromen andachtigen herczen vnd der pristerschafft, den der hirre selber geboten hot vor das fulk gotis zubeten, seynen czorn zuvorsunen, dorczu das heylige almose, daste abeleschet dy sunden, das wir zugeben in deser vnsers zelgerethis schickunge beuolin habin, zuvorgebunge vnser vnd aller vorfarn sunde, haben wir furderlichen betracht deme vorczukomen vnd alzo wore cristenliche mensche in eynekeyt des heylgen cristenlichen glawbens aws deme nymant selig werden mag, dorynne wir eynen woren got bekennen, in des namen wir alzo vnwirdige dyner vnsers herren Ihesu Cristi von sulchim gute vnd hirschafften, die wir von gote entphangen haben vnser zelgerethe zuewigen geczeiten vnwedirrufflichin wolgesund leybes vnd synnen vnd mit sunderlichim vorgehabetem rathe vnser eldisten lieben getrawen, alzo orden, schicken vnd setzczin. Von irsten befelen wir vnser zele gote deme almechtigen vnserm schepper, der sie geschaffen vnd durch seyn heyliges leyden mit seynem blute derlost hot vnd fleen vnd bethen mit aller demutikeyt die muter vnsers lieben hirren Ihesu Christi vnd allis hymmelisches heer, das der hirre geruche umb eris vordiestenis wille an dem tage seynis gestrengin gerichtis durch seyner grundelosen barmherczikeyt wille, vnser armen dorftigen zelen in die ewige rue czu der gemeynschafft allir glewbigen zelen vnd in dy ewige frewde zusetczin. Item, zo orden vnd schicken wir wenne, got obir vns gebewtet czuvorscheyden von dieser werlit, zo en sal unser begrebnisse seyn in dem closter zu den Carthusiern, das wir itczund in crafft dieses briffes zu vnserm letczten willen dirwelin. Item in vollermacht aller vnser lande vnd besundern dieses hernochgeschrebin guttere vnd vleyschbenken, dy wir von vnserm eygen gute gekaufft vnd zu erblichin rechte vnd eygenschafft zu vns brocht haben, alle vnd iczliche vleyschbenke vnser stat Legnicz zu allen den rechten, alzo wir die itczund selber von furstlicher macht halden vnde besitczin, so en geben wir gesampt vnd eyn itczlichs aws vns besundern vnd zu vnserm rechten zelgerethe bescheyden wir hundirt marg grosschin dieser werunge vnd czal jerlichis vnd ewigis czinsis in vnd vff allen vnd itczlichen vnsern vleyschbenken vnd vleyschmargthe zu Legnicz vnd vff allen eren nutczen zugehorungen der douon ader von dem vleyschmargthe zu Legnicz, wy der itczund ist, ader in czukomftigen czeyten in frymargthe vorwandilt, vorlegit ader sust aus gesaczt worde, nichtis awszgenomen, wie das namen hette, zugeben alle jor jerlichen vnd ewiglichin, noch vnserm tode zurichten von den vorkeuffern des vleysches zu Legnicz, die wir vorbinden vnd mechtiglichen vorschreyben, dy voran vor allen czinsen, renthen adir vffgesatcztem gelde, hauptgelde ader wie das sunderlichin namen hette, alle ior ierlichin zugeben, zubeczalen vnd zuantworten vnsern hernochgeschreben zelewartern vnd das gelt vorbas czurichten in alle kirchen, clostere vnd spittele noch sulcher vnser schickunge vnd ordenunge, alzo denne hernoch geschrebin steet. Item czum ersten aus den obgenanten hundirt margken grosschin rechtis ewigis czinses geben wir vnd heysen vnse selewarther awszrichten prelaten vnd tumherren der kirchen zu Legnicz alle itczliche quatuortempora eyn halbschog groschin, den vicarien eyne halbe marg, dem sacristan vnd glockener eyn firdung vnd den manseonarien eyne halbe marg ewigis czinsis, douon sie eyn ewig anniuersarium vnd gedechtnisz halden sollen mit newn lekczen, vigilian vnd zelmesse, alzo man das andern forsten phlegit czuhalden noch gewonheyt der kirchen. Item zo sullen vnsere selewarther alle jor ierlichin geben vnd richten vff sand Marienmagdalenen tage dem capitel czu Legnicz eyne marg, alzo das man douon noch gewonheyt der kirchen eyne refeccio geben sal den prelaten vnd thumhirren, den, dy do eyn der messe sind des selbigen tagis der liebin sand Marie- Magdalene vnd eris achtbarn tagis zu lobe vnd czu sunderlichen eren. Item vff den selbigen tag sand Mariemagdalene wellen wir, das vnsere selewarther auch geben sollen den vicarien vnd manseonarien der obgenanten kirchen vff dem thume eyne marg, die sie allen, dy in der messe sind des obgenanten tagis, distribuirn vnd zu eyner refeccio gebin sullin, alzo das obgeschreben steet. Item den Carthusiern alle vnd itczliche quotuortempora des joris czu ewigen geczeyten drey marg grosschin alzo, das sie vns, vnsern eidern auch eyn gedechtnisse mit eyner vigilian von newn lecczen vnd zelmesse halden sollen alle jor ierlichin. Czu dem selbigen gedechtenisse sal eyn itczlicher Carthusier, her sey prister ader nicht, haben vnd von vnsern selewartern bestalt werden eyn qwart Welisch weyn, den besten, den man alhy ader czu Bresslaw gehaben mag. Auch sal man en douon auch bestellen gute fische vnd weys broth, das man en genug geben sal vnd durch sunderlichis gedechtenisse sollen sie mittenander in dem refectorio alle sampt essen. Item zo gebin wir vnd befeln vnsern selwartern, das sie in die czwn pfarrekirchen zu vnser lieben frawen vnd czu sinte Petir zu Legnicz geben sullen in itczlichin pfarrhoff den pfarrern vnd capplan alle jor ierlichin vff itczliche quatuortempora eyne marg grosschin alzo, das eyn gedechtnisse bestalt werde mit vigilian, mit newn lecczen vnde seelmessen vff itczliche quatuortempora. Item zo sullen auch vnsere selewartern in dy selbigen pfarkirchen itczlichim schulmeyster geben eyn firdung vff alle quatuortempora alzo das sie mit eren schulern helffen die vigilian vnd messe singen nu vnd czu ewigen czeiten. Item den sacristan vnd glockenern in beiden obgenanten pfarren itczlichem besundern vff itzliche quatuortempora eyn firdung, alzo das sie czu sulchim gedechtnisse jerlichin mit den grosen glocken sollen lewten. Item zo beuelin wir vnsern selewartern czu geben alle vnd itczliche quatuortempora in dy drey clostere vnd in itczlich eyne marg vornemlich in das jungfrawen closter alle quatuortempora eyne marg, in das closter czum heyligen creucze alle quatuortempora eyne marg, czu sand Johannis in das closter czu Legnicz eyne marg alle quatuortempora. Also das sy sullen bestellen dy selbige czeyt vns eyn gedechtnisse mit vigilian von newn lecczen vnd selemessen vnd das auch domethe ir speyze vnd trang douon mit wissen vnser selewartern gebessert werde. Item so beuelin wir czu gebin in das closter czu sinte Hedwigen czu Trebenicz der pietanczmeysterynne ader priorynne czu handen der jungfrawen ierlichen itczliche quatuortempora drey marg, alzo das sy vns eyn gedechtenisse czu ewigen geczeyten halden sollen mit newn lecczen vnd dorczu zelemesse vnd ist vnser meynunge nicht, das man das gelt den schaffern antworten sulle sunder den jung-frawen, das sie domethe eren trang vnd speyse gebessern mogen. Item zo beuelin wir vnsern selewartern, das sie in dy dry spittal czu sand Micklos, czu sand Annen vnd czu sand Stenczlaw vor Legenicz in itczlichs besundern alle quatuortempora jerlichin czu besserunge ir speyze geben sollen eyne marg nu vnd czu ewigen czeyten. Item zo wellen wir, was wir in diesim testament off volkomene czal bis uff hundirt marg czinsis nichtis sunderlichin benennet haben, so behalden wir vns dy macht, dy selbigen obrigen vnd vmbenanten czinse hernochmols, wo wir dy gnode vnd den willen haben, adir wie wir das vnsern selewartern sunderlichin beuelin worden, czu bescheyden vnd domethe czuthun noch vnserem willen, vnde wenne wir denne diese obgenanth vnsere selegerethe uff vns beyden vnuorscheytlichin, alzo uff czwene leybe gesaczt vnd gemacht haben, ist is wol vorstenlichin, eyns das ander czu obirlebin douon, in diesim vnserem testament vnd selgerethe orden wir vnd schicken also, das so balde alzo got der almechtige obir vnser eyns gebewtet, das denne noch eynis absterbunge aws den obgenanten hundirt margken ewigis czinsis an hindirnisse eynis itczlichin teylis geruelichin vnsern selewartern vffnemen haben vnd heben sullen fumfczig marg groschin czu voran vor allen czinsen, renten der vleyschbenke ader vleyschmargte ader sulchem vffgesacztem hawptgelde, wie das namen hette, vnd douon czum ersten sulche vnser schickunge an dy benvmeten stete vnsers selegerethis dy helffte teylen bis so lange, das wir beyde von dieser werlitten scheyden, so sal man dy hundirt marg gancz noch vnser obgenante schickunge teylen, von vns, vnsern erben vnd rechten nochkomen gancz vngehindert. Hyeruff das vnser selegerethe vnd leczter wille von vnsern erben vnd nochkomen hirren czu Legnicz vngehindert bleyben moge vnd sulch ordenunge vnd schickunge bey menschlichem gedechtnisse sey vnd alze wir denne zu rechte sulden vnd das mit dem beqwemsten czuschicken mochten, haben wir von angeborner true, dy wir haben vnd tragen czu vnsern liebin getruen burgermeyster vnd rothmannen der stat Legnicz, dy itczund seyn, ader in czukomftigen gekorn werden in alle der mose, alzo dy itczunt vnd eyn itczlichir mit seyme eygennomen benant weren, so kysen vnd setcze wir sie burgermeister vnd rothmanne czu allir obgenanten schickunge vnsers testamentis czu rechten selwarten, in dy wir auch gancz vnser getrawen setczen, sulch vnsere goben, schickunge, zelgerethe vnd letczten gancz vnd forderlichin auszczurichten in alle der mose, alzo obene geschrebin steet zu halden, vnd geben en vor vns, vnsere erben vnd nochkomen erbhirren czu Legnicz noch vnserem tode czu volkomener auszrichtunge vnsers testamentis alle dy fleyschbenken, den vleyschmargth vor sulchin ewigin czins hundirt marg in czunemen vnd mit den vleyschbenken vnd vleyschmargte gancz in vollermacht czu orden, zuschicken, czuhaben, czubesitczen vnd zugebruchin, alzo das sie vnser selegerethe douon gehalden mogen, wy en das beqwemit allerbeste nu vnd ewiglichin gancz vngehindert. In crafft diesis brieffis, an den wir czu rechtim bekentnisse vnser beyder segil haben lossen hengin, gegebin czu Legnicz an dem tage sand Dominici noch Cristi geburt im vierczenhundirt vnd donoch in dem fumfvnddreysigisten jore. Dobey sint gewest der ersame vnd woltuchtigen vnsere liebin getrawen her Johannes Bawde probist czu Legnicz, Heynrich von Gebelczk marschalk, Heynrich Prepticz, Hannos Swencz, Heynrich von Panthenaw, Lewter von Doberszwicz, Hannos Slewicz, Michil Borewicz, Caspar Gawen vnd Wilboldus vnser schreyber, dem dieser briff beuolen wart.

O. d. St. L. No. 353. Beide Siegel in rothem Wachs, gut erhalten, an Schnüren von rother und sckwarzer Seide. Die Urkunde mehrfach beschädigt.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866